لما بتصير الطوشة كبيرة واللي كانوا ماخذين جانب الحياد بحسوا انه النار وصلتهم بتضطروا انهم يتحولوا لجاهة مش حبا في المتطاوشين وانما لانهم خايفين من انه الطوشة تصيبهم بشكل شخصي ، الطوشة في المنطقة كبرت والنار مش راح تضل في غزة واللي امبارح كانوا بتفرجوا وصل (البلل لذقونهم ) على قولة ستي ولما البلل يصل لذقونهم لازم كل واحد فيهم يلبس العباية ويصير مصلح ، القصة كانت في غزة وغزة مسكينة فيها اللي مكفيها ، وقبل ما الطوشة تكبر الكل كان بصبر فيها وبطبطب عليها وبدعيلها وبوعدها انه بس تخلص الطوشة يقعدوا قعدة عرب ويلاقوا حل ، انت بتتنازل شوي وهمه بتنازلوا شوي وبتمشي الأمور ، الطوشة صارت عند دورهم حجر طالع حجر نازل يمكن يصب الكزاز والا حتى السيارة اللي تحت الدار ، عشان هيك صار الوقت الكل يتدخل لانه كل واحد خايف على اللي الو ، ومادام داري صارت بين حجار المتطاوشين ، استنوا شوي ياجماعة خلينا نتفاهم ، الجميع بعد اللي صار في اليمن ما رح يطلع سالم ، واللي محسب الطراطيش بعيده عنه مسكين ، الطراطيش راح تصيبه وتصيب داره وولاده ، طيب شو الحل ؟ نقعد قعدة العرب ، ما هو المطاوشين اخوتنا وولاد عمنا ، وشوي من هين شوي من هين بنلاقي حل ، ما هو مش بس الطراطيش راح تصيب الدور ، ما حتى الشوارع اللي بنمشي فيها من كثر الحجار اللي رموها المتطاوشين على بعض سكرت ، الطوشة كبرت والمختار مشكلته مشغول ، الله يعينه ، خايف على ختم المخترة يروح منه ، وبينه وبين جيرانه القراب والبعاد مشاكل على البيادر ، بس برضه المختار لازم يتدخل ويلاقي حل ، هو صحيح ازعر البلد ما حد بمون عليه بس مرات لازم يقعد للحق والا بتخرب من مرة ، على كل في ناس شايفين انه الطوشة راح تخرب البلد ، بس بيني وبينكم ازعر البلد لازم ينحطله حد والا بتروح البلد في شربة مي ، عشان هيك الجماعة اللي حوالين المختار صار لازم يضغطوا عليه يتدخل والا همه اول حد راح يدفع المشاريب .